NSSF YAPONGEZWA NGUVU KAZI EXHIBITION 2013.

Balozi wa Tanzania nchini Kenya Dk. Batilda Burian akisaini kitabu cha wageni kwenye banda la Shirika la Taifa la Hifadhi ya Jamii (NSSF) katika maonesho ya Kikanda ya Wajasiriamali yananayojulikana kama Jua Kali/ Nguvu Kazi exhibition na kufanyika jijini Nairobi juzi.

NSSF yapongezwa Nguvu Kazi Exhibition 2013

Mwandishi Wetu

BALOZI wa Tanzania nchini Kenya, Dk Batilda Buriani, amelipongeza Shirika la Taifa la Hifadhi ya Jamii (NSSF), kwa harakati chanya za kuwakomboa wajasiriamali wakubwa na wadogo waliopo katika nchi wanachama wa Jumuiya ya Afrika Mashariki (EAC).

Dk Buriani alitoa pongezi hizo kwa NSSF na Taasisi kutoka Tanzania chini ya Wizara ya Afrika Mashariki na Wizara ya Kazi (MKURABITA, TFDA na TanTRADE), hivi karibuni baada ya kushiriki Maonesho ya Wajasiriamali ya Jua Kali/ Nguvu Kazi Exhibition.

Nguvu Kazi Exhibition 2013 yalifanyika jijini Nairobi, ambako NSSF ilishiriki kwa mara ya nne, kwa nia ya kuwafikia wajasiriamali ili kuwaongezea elimu kuhusu mafao ya shirika lake, yakiwemo ya matibabu, uzazi, kuumia kazini na Mikopo ya Saccos.

Dk Buriani alikiri kuvutiwa na harakati chanya zinazofanywa na NSSF, hivyo hakusita kulipongeza huku akilitaka kuongeza kasi ya kuwafikia wajasiriamali na wakulima, ili kuhakikisha wanaelimishwa na kutumia fursa zinazopatikana kwa kujiunga na shirika hilo.

Kwa upande wake Meneja Kiongozi Uhusiano wa NSSF, Eunice Chiume, alisema ili kutanua fursa miongoni mwa wajasiriamali wa Jumuiya ya Afrika Mashariki, shirika lake linatambua umuhimu wa kutumia maonesho Jua Kali/ Nguvu Kazi Exhibition kuwafikia.

“NSSF imeshiriki Jua Kali/ Nguvu Kazi Exhibition kwa mara ya nne, lengo likiwa ni kutanua wigo wa huduma za shirika nje ya Tanzania, ikiwamo kuongeza idadi ya wanachama wa mafao na huduma mbalimbali za NSSF,” alisema Chiume.

Chiume aliongeza kuwa, NSSF linatoa mafao saba kama tamko la Shirika la Kazi la Kimataifa (ILO) linavyotaka, ambako kwa niaba ya shirika aliwatangazia wadau wa sekta binafsi wakiwamo wajasiriamali na wakulima ‘Fursa’ mbalimbali zinazopatikana kwa kujiunga NSSF.

NSSF pia imetoa ‘Fursa’ kwa  Watanzania waishio Ughaibuni kujiunga na shirika kwa mfumo wa WESTADI na kuwawezesha kupata mafao ya matibabu kwa Wategemezi wanne waliopo Tanzania na usafirshaji wa mwili mwanachama anapofariki nje ya nchi.