LUHAVI AWATAKA WATUMISHI CCM KWENDANA NA KASI YA MABADILIKO YA SASA KIUTENDAJI

Na mwandishi Maalum, Mbeya.

Naibu Katibu Mkuu wa Chama cha Mapinduzi ( Bara) Rajab Luhwavi, amewataka watumishi wa chama kubadilika kwa vitendo ili kwendana na hali ya mazingira yaliyopo sasa na kuonya kuwa asiyetaka kwendana na mabadiliko hayo ataachwa kupisha wengine waendelee.

Amesema, mabadiliko ndani ya CCM, siyo dhana iliyoanzishwa wakati wa uchaguzi mkuu, kama vilivyojinadi baadhi ya vyama wakati huo, bali ni dhana ambavyo Chama kiliiazimia kuitekeleza wakati wa mkutano wake mkuu uliopita.

Luhwavi alisema hayo, leo mjini Mbeya wakati wa kikao chake na wafanyakazi wa Chama cha Mapinduzi na Jumuiya zake katika mkoa huo, kikao ambacho pia alikitumia kuwapa fursa watumishi wa kada mbalimbali kuelezea kero au changamoto zote zinazowakabili kama wafanyakazi wa chama.

Luhwavi alisema ni lazima kila mtumishi wa chaa kuwa mstari wa mbele kwa kufayakazi kulingana na wakati uliopo ili ifikapo mwaka 2020 wananchi waikubali CCM kutokana na kile kilichofanyika.

Alisema, watumishi wa CCM, ndiyo nguzo muhimu ya Chama katika kila jambo, akifafanua kwamba watumishi wa Chama ni tofauti na viongozi wa chama kwa kuwa viongozi wao si watendaji bali ni watekelezaji wa yale anayokuwa wameandaliwa na watumishi.

"Ninyi ndio mnaosababisha picha halisi ya Chama ionekane vipi, siyo viongozi, maana ninyi ndio ambao huandaa hata mikutano ya viongozi, na ili mikutano hiyo ionekane imefaa ninyi nndiyo chachu, kwa hiyo watumishi ndiyo nguzo kubwa ya

Chama katika ufanisi wake", alisema Luhwavi.

Mapema, Katibu wa CCM Mkoa wa Mbeya Alhaji Mwangi Kundya alimpongeza Naibu Katibu Mkuu kwa hatua yake ya kuamua kuzungumza na watumishi wa chama, na kwamba katika utumishi wake ndani ya Chama hiyo ilikuwa ndiyo mara ya kwanza kuhudhuria kikao ambacho Naibu Katibu Mkuu anazungumza na wafanyakazi.

Kundya alimuomba Naibu Katibu Mkuu kuwapangia vituo vya kazi makatibu watatu, ambao wapo kwenye Ofisi ya CCM ya mkoa huo huku wakiwa hawana kazi maalum.

"Mheshimiwa Naibu Katibu Mkuu, tunao Makatibu watatu hapa, lakini hawajapangiwa vituo, sasa tutakuwa tunaendelea kuwalipa huku hakuna kazi wanazofanya, mwisho tutaonekana na sisi ni majipu, maana kazi zilizopo hapa si nyingi kiasi cha kuhitaji makatibu hao wa nyongeza", alisema  Kundya.

Naibu Katibu Mkuu wa CCM Bara, Luhwavi yupo katika ziara ya kukagua uhai wa Chama ndani ya Chama katika mkoa huu wa 

Mbeya, kabla ya kwenda Njombe.