NAIBU WAZIRI WA USHIRIKIANO WA AFRIKA MASHARIKI AHITIMISHA ZIARA YAKE WILAYA ZA KANDA YA ZIWA ZINAZOTEKELEZA MIRADI YA UTUNZAJI WA MAZINGIRA.

Mheshimwa Dkt.Abdulla Juma Abdulla Naibu Waziri wa Ushirikiano wa Afrika Mashariki amehitimisha ziara yake ya Siku sita kitika Wilaya  zinazotekeleza miradi ya Utunzaji wa Mazingira na Maendeleo endelevu ya Ziwa Viktoria  (LVEMP II )  pamoja na mradi wa Maji na Usafi wa Mazingira (LVWATSAN) leo tarehe 8 Februari, 2014.

Kabla ya kuhitimisha ziara hiyo Mheshimiwa Dkt. Abdalla alitaka kujua maendeleo ya Kituo cha utafutaji  na Uokoaji katika Ziwa Viktoria kilichopo njini Mwanza na hivyo alitembelea ofisi za Bandari ya Mwanza kuzungumza na watumishi wa Mamlaka ya Bandari Tanzania (TPA). Akitoa taarifa yake kwa mheshimiwa Waziri Afisa Mfawidhi wa Mamlaka ya Udhibiti Usafiri wa Nchi Kavu na Majini (SUMATRA) Ndugu Japheti Loisimaye alisema kuwa Bandari ya Mwanza inahudumia Nchi za Uganda na Kenya na sasa inahudumia pia Sudan ya Kusini.

Alieleza kuwa katika ziwa victoria lina visiwa 60 ,  meli 50 zenye ukubwa wa tani 50 na zaidi. Meli 39 kati ya hizo ziko katika hali nzuri na zinafanya kazi,  Meli 11 zimesimamishwa kwa sababu ya kiufundi na kiusalama. Aliendelea kusema kuwa katika jitihada ya kuboresha uratibu wa uokoaji na utafutaji pale inapotokea ajali za majini Baraza la Mawaziri wa Sekta ya Uchukuzi Mawasiliano na Hali ya Hewa  wa Afrika Mashariki katika kikao chao cha tarehe 19-23 Januari 2009 waliidhinisha kujengwa kwa Kituo cha utafutaji na Uokoaji  (MRCC) katika jiji la Mwanza. SUMATRA ilitenga eneo la ofisi za muda katika jengo la  NSSF jijini Mwanza wakati jitihada zikifanywa kupata eneo la kudumu la ujenga kituo hicho kitakachokuwa chini ya Kamisheni ya Bonde la Ziwa Victoria (Lake Victoria Basin Commission – LVBC) ambayo ni taasisi ya Jumuiya ya Afrika Mashariki.

Aliendelea kusema kuwa kiwanja tayari kimepatikana kwa ajili ya kujenga kituo hicho na hati ya kiwanja hicho tayari imetolewa. Mheshimiwa Naibu Dkt. Abdulla alipata nafasi ya kutembelea kiwanja hicho ambacho kipo karibu na bandari ya Mwanza North. Aidha aliwapongeza SUMATRA kwa hatua iliyofikiwa   na kuwahimiza kuwa wanunue vifaa kama vile radio calls ma vifaa vya ofisi wakati jududi za kutafuta pesa za ujenzi wa kituo hicho unaendelea.

 Aliendelea kusema kuwa Watumishi wamejipanga vizuri kutoa huduma ila tatizo ni Reli kutoka Dar es Salaam kuja Mwanza kutokufanya kazi, hivyo kupungua sana kwa mizigo. Mizigo inayosafirishwa kwa wingi kwa sasa ni unga wa Bakhressa unaosafirishwa kwa maroli kutoka Dar es Salaam na baadaye kusafirishwa kwa meli kwenda Uganda na Sudan ya Kusini. Aliendelea kusema kuwa kuna wafanyabiashara wengi kutoka Uganda ambao wanatumia Bandari ya Mwanza na hivyo hulazimika kupakia mizigo yao Mwanza hadi bandari ya Kemondo Kagera na kisha kupakia mizigo hiyo kwenye maroli kuelekea Uganda na Sudani ya Kusini.

Naye Capt Mkongoki alieleza kuwa Mwaka 1999 kulikuwa na meli iliyokuwa inakwenda Portbell Uganda ila ilionekana inapata abiria wachache kwa kwenda  Portbell Uganda kwani ilikuwa na uwezo wa kubeba abiria 1200 lakini ilikuwa ikipata abiria kati ya 200-300. Kwa sasa imeonekana kuna mahitaji makubwa ya meli kwenda Portbell Uganda, Danida italeta meli mpya mwaka kesho (2015) na meli hiyo inategemea kuanza kazi mwaka 2016. Hii ni kwa ajili ya kurahisha usafiri na usafirishaji katika nchi za Afrika Mashariki.

Aidha alieleza kuwa kupitia Mpango wa matokeo Makubwa sasa (BRN) Serikali imetoa shilingi bilioni tano  (5) kwa ajili ya kuboresha Bandari ya Mwanza , hata hivyo Serikali inatakiwa kuweka nguvu kubwa katika kujenga reli na pia kuweka mkakati wa kulima zaidi badala ya kuzuia chakula kuuzwa nje ya nchi.

Naye Mheshimwa Dkt.Abdulla aliongeza kuwa mojawapo ya  vipaumbele vya Tanzania ni kuwa ghala la chakula kwa nchi za Afrika Mashariki na hivyo tayari serikali imeweka na inaendelea kutekeleza mpango wa Kilimo kwanza ili kuhakikisha Tanzania inazalisha zaidi mazao ya kilimo na kuuza katika nchi za Afrika Mashariki.

Communications Expert
Ministry of East African Cooperation (MEAC)
P. O. Box 9280,
Dar es Salaam 
TANZANIA
skype: faraja101
+255 754 271 750

 

 Naibu Waziri wa Ushirikiano wa Afrika Mashariki Abdulla Juma Saadalla akioneshwa kiwanja kitakachotumika kujenga kituo cha utafutaji na uokoaji katika ziwa Victorai (MRCC) njini Mwanza

Mr Faraja Mgwabati   Naibu Waziri wa Ushirikiano wa Afrika Mashariki Abdulla Juma Saadalla akitembelea  Bandari ya Mwanza.