Mama Kikwete awataka walemavu kutokumlaumu mwenyezi Mungu kwa ulemavu wao.

Na Anna Nkinda – Maelezo, Lindi

Watu wenye ulemavu wa viungo wametakiwa  kutosikitika kwanini Mwenyezi Mungu aliwaumba hivyo na kujiona wanyonge bali wajione wako  sawa na watu wengine  kwani  katika maisha ya binadamu kila jambo lina makusudi yake.

Hayo yamesemwa leo na Mke wa Rais Mama Salma Kikwete wakati akiongea na wazee wenye mahitaji maalum wanaoishi katika kituo cha Rasbura  kilichopo wilaya ya Lindi mjini.

Mama Kikwete ambaye pia ni Mwenyekiti wa Taasisi ya Wanawake na Maendeleo (WAMA) alifika kituoni hapo kwa ajili ya kuwajulia hali wazee hao na kuwapatia zawadi mbalimbali za mchele, nyama, sukari, unga wa ugali, vitunguu, mafuta ya kupikia, nyanya na soda kwa ajili ya sikukuu ya Pasaka.

Alisema inawezekana Mwenyezi Mungu aliwaumba hivyo walivyo ikiwa ni kwa makusudi ili iwe njia rahisi ya kumfikia yeye na kuwataka kushukuru  kwa yote. Jambo la muhimu aliwaomba  waendelee  kuishi kwa amani na upendo kama ndugu.

“Nilipanga  siku ya leo kusherehekea sikukuu ya Pasaka pamoja nanyi huwa nafanya hivi katika sikukuu  mbalimbali kama X-Mass na Mwaka mpya, nasherehekea na watoto yatima na watu wazima wa dini mbalimbali nawaomba adhimisheni siku hii katika mazingira ya upendo, amani na  utulivu”, alisema Mwenyekiti huyo wa WAMA.

Akielezea Historia ya kituo hicho kinachomilikiwa na kanisa Katoliki Jimbo la Lindi  Mkurugenzi wa KARTAS  Mzee Saimoni Mnimbo alisema miaka ya nyuma kituo hicho  kilikuwa  ni Gereza la wafungwa lakini mara baada ya kujengwa kwa gereza jipya ndipo Serikali ililipatia jengo hilo Idara ya Ustawi wa jamii na ikaanza kulitumia kama kituo cha wazee wasiojiweza.

Mzee Mnimbo alimshukuru Mama Kikwete kwa  moyo wake  wa huruma na kuamua kwenda kuwatembelea na kuwapatia zawadi mbalimbali  vikiwemo vyakula na vinywaji na kuwaomba viongozi wengine kuiga mfano ingawa kanisa linawahudumia wazee hao bali nao wanatakiwa kuwasaidia.

“Tunawashukuru wadau mbalimbali wanaotuunga mkono na kuwahudumia wazee hawa. Hapa kwetu hakuna  tatizo la maji,  kuna kipindi  mji mzima wa Lindi haukuwa na maji lakini katika kituo hiki tulikuwa na maji ya kutosha  tunaishukuru ofisi ya Mkuu wa mkoa kwa kutulipia bili  ya maji kila mwezi”, alisema Mzee Mnimbo.

Kwa upande wake Mwenyekiti wa Chama Cha Mapinduzi (CCM) Mkoa wa Lindi Mzee Ally  Mtopa alisema katika kituo hicho hakuna mambo ya udini  kwani binadamu wote ni sawa na kwa yeyote anayejijuwa kuwa yeye ni binadamu basi akili yake ikitazame kituo hicho na kuweza kukisaidia .

Naye Mzee Mohamed Chitawala  ambaye anaishi katika kituo hicho alisema wanakabiliwa na changamoto mbalimbali zikiwemo za afya kwani wakienda Hospitali kupata matibabu wanapata usumbufu  na  katika kituo hicho hakuna  dawa za huduma ya kwanza.

Tangu mwaka 1995 kituo hicho kinamilikiwa na kanisa Katoliki jimbo la Lindi, wazee wanaoishi hapo  wana ulemavu wa macho na viungo kutoka  dini zote  ambao wametelekezwa na jamaa zao. Idadi yao ni 10 kati yao wanawake ni sita na wanaume ni wanne kutoka maeneo mbalimbali ya mkoa huu.