KAMPUNI YA MANTRA TANZANIA YATOA ELIMU JUU YA MADINI YA URANI.

Na Mwandishi Wetu, Songea

KAMPUNI ya Mantra Tanzania jana imeanda washa yenye lengo la kuelimisha kamati ya Ushauri (RCC) Mkoa wa Ruvuma juu ya madini ya urani ikiwa na lengo la kuongeza uelewa kwa wananchi mkoani humo juu ya matumizi ya madini hayo.

Warsha hiyo iliyohudhuriwa na Mkuu wa Mkoa wa Ruvuma, Mhe. Said Mwambungu iliwakutanisha wadau mbalimbali kutoka katika Tume ya Nguvu za Atomiki Tanzania  (TAEC), Baraza la Mazingira la Taifa (NEMC), Wizara ya Nishati na Madini (MEM) na wawakilishi kutoka kampuni ya Mantra Tanzania.

Akizungumza wakati wa warsha hiyo, Mkurugenzi wa Mantra Tanzania Asa Mwaipopo alisema kuwa warsha hiyo ni mwendelezo wa elimu kwa umma kwa wananchi wanaozunguka mradi wao wa Mto Mkuju pamoja wananchi waliopo pembezoni na mradi huo.

"Matumizi mazuri ya urani duniani ni katika uzalishaji wa umeme kutoka nishati ya nyuklia. Hivi sasa, kuna riakta za nyuklia 437 duniani ambazo uzalishaji wake kwa jumla  ni megawati 375,000 za umeme ambazo ni kadirio la asilimia 15 ya uzalishaji wa umeme dunia nzima.

Mwaipopo alisema kuwa matumizi ya madini yatakaochimbwa kwenye mradi wa Mto Mkuju yatatumika kwa njia za amani huku akisisitiza kuwa kampuni yake pamoja na wawekezaji wapo tayari kuendeleza mradi huo hata kama soko la madini hayo limeendelea kuporomoka siku hadi siku.

"Tukio la Fukushima limeathiri kwa kiasi kikubwa soko la urani lakini Kampuni ya Uranium One pamoja na wawekezaji wake wanaona kwamba ni suala la muda mfupi. Tunaimani kuwa mradi wa Mto mkuju utajenga mahusiano ya muda mredu baina ya waeekezaji wake, serikali na wananchi kwa jumla," aliongeza.

Aidha Bw. Lemigos Kawala kutoka Tume ya Nguvu za Atomiki Tanzania (TAEC) wakati akiwasilisha mada juu ya jukumu la TAEC katika utunzaji wa mazingira na kuulinda umma dhidi ya mionzi na katika kukuza matumizi salama ya teknolojia ya nyuklia alisema kuwa kiwango cha mionzi katika maeneo ya madini kinapimwa na kufanyiwa tathmini.

Naye Dkt.  Madoshi Makene Afisa Mazingira kutoka Baraza la Taifa la Mazingira (NEMC) wakati wa warsha hiyo alisema kuwa kuna haja ya kuwa na miradi endelevu inayokidhi  mahitaji ya leo na kesho  bila kuathiri mazingira kwa ajili ya vizazi vijavyo.

Mwakilishi toka Wizara ya Nishati na Madini, Zacharia Bongole aliwataarifu wananchi kuwa Mradi wa Mto Mkuju umeruhusiwa na kupatiwa leseni chini ya Sheria ya Madini ya mwaka 2010 ambayo ina vipengele vipya ambavyo vinajadiliwa katika Mkataba wa Maendeleo ya Madini na wawekezaji. Aliitaarifu RCC kuwa serikali ina sera ya Madini ya mwaka 2009 inayohusiana na Urani kama madini.

Mbunge wa Namtumbo, Mhe. Vita Kawawa wakati wa warsha alisisitiza kwamba kuna umuhimu wa kampuni mbalimbali za madini kuhakikisha kwamba jamii zinazozunguka migodi zipo katika nafasi nzuri ya kufaidika na uendeshaji wa migodi hiyo.

"Licha ya misaada ya kijamii kutoka katika miradi hiyo, serikali za mitaa zipatiwe kodi kutoka kwa miradi hiyo ambayo itasadia kuinua maeneo hayo kwa kiasi kikubwa kama itatumika vizuri," Kawawa alisitiza.